「給食番長 ～沖縄弁バージョン02（方言マスター編）～」by ラジオ沖縄DJ糸数昌和
ウチナーグチのプロが翻訳してくれました。
01
キーン コーン カーン
うーまくわらばーたー小学校ぬ給食ぬ時間がはじまいびたん
＜ HOME
「給食番長 ～沖縄弁バージョン02（方言マスター編）～」by ラジオ沖縄DJ糸数昌和
ウチナーグチのプロが翻訳してくれました。
01
キーン コーン カーン
うーまくわらばーたー小学校ぬ給食ぬ時間がはじまいびたん
02
どかん！ ばしゃん！
「まーさシチューや わんにんかいねーれー」
「あきさみよー 番長やみてぃとらせー」
03
「とー しむさ んなしかんせーぬくち りっか あしびがいちゅんどー せいじ へーくせー！まさお ぬーそーが だいだい すせーうち いちゅんどー」
「あぜー まっちとらせー！ 番長さーん
まさお いすがな！」
「あぎじゃびよーい 野菜や しかんぐとぅ わんにんぬくちゃんどー」
「わんにん」
「あんすらーわんにん」
１年２組えー ちゃーうーそーどー
入学しから なままでぃちゅけーんやてぃん 給食 ちゅらーく かれーうらん
04
んなが昼ぬ休みにあしびがんじてぃ んじゃるじぶん
給食室うてぇー おばさんたーが まじゅーんあちまてぃ なちよーたん
「あきさみよー １年２組えー またあんすかなー ぬくちぇーさやー」
「なー くりさーに みちち ちゃーぬくしどー」
「番長んりぃち よばっとーるわらばーが んなしかしーまーしーそーんでぃ」
「うぬわらばー ちゃがなさんでーならんしが」
05
なーちゃぬ給食ぬ時間 にじららんなてぃ給食ぬおばさんたーや うちすねーてぃ １年２組ぬ教室んかい わぃくでぃいちやびたん
「えー うーまくー やーが番長やらやー！ ちゅらーくいちよーてぃ むのーかめー」
「へっへへーん べーるやさ わんねー 牛乳んぱぬん いっぺーしかん」
番長や いーせーむるちかん
「まてー ぬくしーねー ばちかんじゅんどー」
「うんぐとーる給食 たーがかむが いかなしとぅんかまんさ」
06
１年２組えー うぬ日―ん うふぉーく給食 ぬくさびたん
「へっへへ やっとぅ かたじきんうわたい あしびがとぅらな」
「なー ぬーんでぃいちゃんてーまん ちゃーんならんどぅあがやー」
給食ぬおばさんたーみーから なだそーそーんじやびたん
あんし うぬなーちや
07
キーン コーン カーン コーン
ちにひーじーぬぐとぅ 給食ぬ時間がちゃーびたん
やしが 給食室ぬ めーうてぃ んながさわじょーいびーん
「ぬーが！ せいじ ぬーがらあいるすてぃー」
「番長さん あま んーちまー！ 給食ぬおばさんたーが うらんなとーんでぃどー」
給食ぬおばさんたーが うらんないねー
んながあさばんや かまらんないるばーやさ
「あーーーん」「びぇぇえーーーーーん」
「番長が かまらんせー むるぬくせーんでぃあびやーすぐとぅ
おばさんたーや わじたるばーや あらんがやー！」
「番長 ちゃーすがやーなー！」
「わびしちゅーせー ませーあらに番長！」
「ちゃーがな しとらさんがやー番長！」
「番長！」「番長！」
08
んな わじわじー はじまとーしが あんしん番長や ぬーぬぐとぅんねーらん
「ふっふん ぬーんあらんさ まかちょーけー！給食ぬあたい わったーさーに ちゅくてぃみしら いちゅんどー まさお！」
「ちばいんどー」
「せいじ！」
「まかちょーけー番長さん！」
「たかふみ！」
「おっけー番長！」
「おばさんたーやか まーさる給食 ちゅくてぃみしら ふっふふふ」
09
「せいじ！ ちゅーや ぬーちゅくぃが！？」
「え えーと ビーフカレーとぅ ひじきぬサラダ！」
「わかたん まさお ししむっちくーわ！！」
「あきさみよー んぶさんどー 番長！」
「うり せいじ！ イユさーに だしとぅぃんどー！」
「だんじゅか 番長さん あんしりきやーやる！」
「たかふみ！ あじあんべーや アップルさーに！」
「なまぬぐとぅやさ 番長！」
「うおおおお！！！」
トントントントントントントン！！！
番長や いちゅいんじてぃ ないるかじり 材料ちっちしこーいそーたん
10
「ちゃーが うり！！６１２人分でぃ いちやんてーまん ぬーぬぐとぅんねーらん！じゃんじゃん じゃんじゃん 具いりれー！かちゃーち かちゃーちかちゃーしみぐらせー！！」
「番長！ あんし ちびらーさる！」
11
やっとぅ 番長たー 給食が りきやびたん
んな とんじゃーもーやーし うっさくゎったーそーいびん
「はいさい！ うさがれー」
「あっさみよー あんしちびらーさる番長！ まーさぎさぬ！！」
12
ガッタン ガタン
あり？ ありあり？ んな 居ちょーたるむんぬ んまから立ちはじまいびたん
「ぬーなとーるばーが！？ んな！？」
番長や たましぬぎやびたん
「まーこーねーん かまらんしが」
「うんぐとーる 給食んちんあみ むるかまらんしが」
「あーーーん」「びぇぇえーーーーーん」
「かまらん？ わったーや んなぬたみでぃうむてぃ ちむいっち ちゅくたるむんぬ」
13
学校から けーいる時間ぬん過ぎてぃ アコークローなてぃ ちゃーびたん
「かんないるはぢぇー あらんたるむんぬ……わったーが まーさむんでぃ うむとーたせー うふぉーく いったるむんぬ」
「番長さんぬ 包丁じけーや ちびらーさたんどー」
「あねーやしが かりとらさんあれー ちゃーんならんさ」
「えー 番長さん あちゃーん ちゅくいるばーいっ？」
「あちゃーやー…」
「おばさんたー… けーてぃくーんがやー…」
14
ゆーん暮りてぃ まぎなーび まかいどうぐゴシゴシゴシゴシ
なー 番長たーや なまにん なちぎさーなとーいびーん
うぬとち… ガチャリ
「なまねーわかたらやー？」
「あね！ うぬ声ぃーや！？」
「おばさん！」
15
「おばさんたーやてん んなんかい かみぬくさりーねー
なちかしくないんどー まーくまーくかりとらせーやーんでいちぃ
めーにち ちむいってぃ 給食おーちゅくとーることぅやさ」
「あにんやしが 給食んかい いってーせー どぅー がんじゅうさしまぎくふるいーてぃ
いちゅるたみに じひ いりらんれーならん かみむんびけーん いっちょんどー
あんすぐとぅ んなが ぬくしーね おばさんたーや いっぺーしわやんどー」
16
「あんる やてーさやー」
「おばちゃん なままでぃ くぶりーやいびたん くくるからにふぇーでびたん」
「しむさ わかれー しむさ」
「あちゃーからー わたぬみーかまーに まぎーくふるいーりよー」
「わんねー へーくまぎくなてぃおばちゃん むーくないん」
「あきよー 番長よー ぬーーんでぃんいいさ うふふふふ」
「うわあっははははははは」
ゆるぬ給食室んかい わらいぎぃーぬちかりてぃちゃーびたん
17
さてぃ なーちゃ
１年２組ぬ机ぬ うわーびんかい ちゅらーくならびらっとーる まーさぎさる 給食が うふぉーく うかっとーん！
ちゅらーく居ちぃ 給食番長ぬ 合図んかいあーち 手―んあーち んな まじゅーん
くわっちーさびら！
沖縄の一般家庭と方言マスターの翻訳の違いを楽しんでみるのもまた一興。
「給食番長～沖縄弁バージョン01（一般家庭編）～」
http://www.edomacho.com/ehon/ehon/w-e-bancho-okinawa01.html
給食番長シリーズ ①
『 給食番長 』好学社 (2014/07)
作：絵 よしながこうたく
